വാടാത്ത പൂക്കള്‍

നിഴലുകള്‍ക്ക് നിറം കൊടുക്കുന്നത് സ്വപ്നം
കണ്ടിരുന്നു ഒരു പെണ്‍കുട്ടി .
മുറ്റത്തു ഒരു മുല്ലവള്ളി ഉണ്ടാവുമെന്നും സുഗന്ധം
പൊഴിക്കുന്ന പൂക്കള്‍ നടവഴിയിലെങ്ങും വീണു
കിടക്കുമെന്നും അവള്‍ സ്വപ്നം കണ്ടു .
വാഴനാരില്‍ ഇഴകോര്തപ്പോഴും പൂക്കള്‍
പുഞ്ചിരിച്ചു കൊണ്ടേയിരുന്നു.
വിഗ്രഹത്തില്‍ ചാര്‍ത്താന്‍ ഒരുങ്ങിയപ്പോഴാണ്
മുന്നില്‍ ആരോ തലേന്ന് വെച്ച ഒരു കുമ്പിള്‍ പൂക്കള്‍ കണ്ണില്‍പ്പെട്ടത് ,
വാടാത്ത ആ പൂക്കളുടെ സുഗന്ധം
അവളെ സ്വപ്നത്തില്‍ നിന്നുണര്‍ത്തി.
പെണ്‍കുട്ടി ഓടി മുറ്റത്തു ചെന്ന് നോക്കി ,
നടവഴിയിലെ പൂക്കളെല്ലാം ആരുടെയോ
കാലിനടിയില്‍ പെട്ട് ചതഞ്ഞിരുന്നു .

നീലിച്ച ദിവസങ്ങള്‍

ഏകാന്തതയ്ക്ക് നീല നിറമാണ് ;
കാല്‍ക്കീഴില്‍ നിന്ന് ഒലിച്ചു പോകുന്ന അവസാനത്തെ
മണല്ത്തരിയെയും ആഴങ്ങളിലൊളിപ്പിച്ച കടലിന്റെ നിറം .
ഹൃദയത്തിന്റെ വലത്തേ കോണില്‍ വേദന മിടിക്കുമ്പോള്‍
തളം കെട്ടുന്ന കണ്ണുനീരിനും നേര്‍ത്ത നീല നിറമുണ്ട് .
ഒഴുകുന്ന കണ്ണുനീരിനു നീല നിറമില്ലെന്ന് കണ്ടു പിടിച്ചത്
മഴമേഘങ്ങളില്ലാത്ത ഒരു പ്രഭാതത്തിലായിരുന്നു
അന്നുമുതല്‍ അവള്‍ കരയാന്‍ തുടങ്ങി.

എന്റെ കഥ

ഒഴുകിയകലുന്ന പുഴക്കും പറന്നു പോകുന്ന പക്ഷിക്കും
പറയാനുണ്ടാവും ഒരു വേര്‍പാടിന്റെ കഥ .
പറഞ്ഞു തീര്‍ക്കാന്‍ ഇനിയും നിമിഷങ്ങള്‍ ബാക്കി നില്‍ക്കെ
യാത്ര തുടരുന്നു പുഴ ,
ചിറകു വിടര്‍ത്താന്‍ എനിക്കെന്തിഷ്ടമെന്നു പക്ഷി .
ഇരുട്ടിന്റെ പൊത്തില്‍ നിന്നും കഥകള്‍ ഇറങ്ങിവന്നു ,
നിദ്രയെ ദൂരെയകറ്റി എന്റെ മൌനത്തിനു കൂട്ടിരുന്നു,
പുലരിയുടെ അവസാനയാമത്തില്‍ ഞാന്‍ ഉണര്‍ന്നപ്പോള്‍
നിദ്ര മാത്രം അസ്വസ്ഥയായി .
കവിളിലെ കന്നുനീര്‍ച്ചാല് രാത്രിയുടെ ബാക്കിപത്രമായി ശേഷിച്ചു
ഞാന്‍ കഥകളെ തിരഞ്ഞു നടന്നു തുടങ്ങി ,
കനല്‍പ്പാതയില്‍ നീറുന്ന കാലുകള്‍ ലക്ഷ്യമില്ലാതലഞ്ഞു.
ഒടുവില്‍ കണ്ടുമുട്ടിയപ്പോള്‍ പുഴ ചിരിച്ചു ,
ആ കഥകള് ഒരു തവണത്തേക്ക് മാത്രം ;
നിനക്കന്യമായ വേദനയുടെ കയ്പുനീര് പകരുവാന്‍ മാത്രം .
പുഴ വീണ്ടുമോഴുകി , കഥകള്‍ ഉപേക്ഷിച്ച്
എന്റെ സ്പന്ദങ്ങള്‍ മാത്രം പകരുന്ന താളത്തില്‍ .
ഞാന്‍ പക്ഷിയെ കാത്തിരുന്നു , എന്റെ കഥ പറയാന്‍
അതില്‍ വേര്‍പാടില്ലയെന്നോര്‍ത്തു ഞാന്‍ ഖിന്നയായി .

അറിയുന്നു ഞാന്‍ .....

നിറങ്ങളിയന്നോരോര്‍മ്മതന്നാഴിയില്‍
നിന്നളന്നെട്ത്തൊരു നാഴി മുത്തുകള്‍
ഒരു ദീര്‍ഘനിശ്വാസതിന്നതിരില്‍ തുളുമ്പി
തെറിച്ചു വീണെങ്ങോ നഷ്ടമായി .

ഒരു സായന്തനത്തിന്‍ ചുവപ്പ്
പടര്‍ന്നിരങ്ങിയോരെന്‍
അന്തരാളത്തിലതിന്‍ മുഴക്കം
മാറ്റൊലിക്കൊണ്ടു .

പിറക്കാന്‍ മടിച്ചൊരു കണ്ണ് നീര്തുള്ളിയായി ,
ഉടലെടുക്കാന്‍ മറന്നുരങ്ങിയോരീണമായി
സാന്ദ്രമായ് താളത്തിലോഴുകി ,രാഗം ,
പെയ്തൊഴിയാന്‍ വെമ്ബിയൊരു രാത്രിമഴയായി .

തുറക്കുവാന്‍ മറന്നൊരെന്‍ ജാലക വാതിലില്‍
മുട്ടി വിളിക്കുമാ പൂങ്കാറ്റിനോടെന്തു ചൊല്ലാന്‍,
തുറന്നിടട്ടെ മലര്‍ക്കെയീ ചില്ല് വാതില്‍ ഇനിയെന്നേക്കുമായി.

ഒസാമ ബിറ്റ് ലാദന്‍

കലാലയ ജീവിതത്തിന്റെ മരിക്കാത്ത ഓര്‍മ്മകള്‍ . ഒരു രസികന്റെ നേരംപോക്ക് ...




വീഡിയോ കടപ്പാട്‌ : യുട്യൂബ്

പാസ്‌ വേര്‍ഡുകള്‍

വാക്കുകള്‍ എന്നും എനിക്ക് പ്രിയപ്പെട്ടവ തന്നെ
അക്ഷരങ്ങള്‍ക്കിടയില്‍ അക്കങ്ങള്‍ നട്ടു അവയെ ഞാന്‍ ബലവത്താക്കി
പാസ്‌ വേര്‍ഡ്‌കള്‍ തീര്‍ത്ത സുരക്ഷിതത്വത്തില്‍ ഞാന്‍ നിര്‍ഭയം ഉറങ്ങി
ഉറക്കത്തില്‍ എന്റെ സ്വപ്നങ്ങളെ ഒരു വൈറസ് കാര്‍ന്നു തിന്നു
ഉറക്കമുന്നരാനുള്ള പാസ്സ്‌വേര്‍ഡ്‌ ഉം മോഷ്ടിക്കപ്പെട്ടു
പിറ്റേന്ന് രാവിലെ എനിക്ക് പകരം മറ്റൊരാള്‍ പ്രഭാതത്തിലേക്ക്‌ ലോഗിന്‍ ചെയ്തു
അയാള്‍ എന്റെ ദിനചര്യകളെ മാറ്റി എഴുതി
നിതാന്തമായ ഉറക്കത്തില്‍ ഞാന്‍ സ്വപ്‌നങ്ങള്‍ നെയ്തുകൊണ്ടിരുന്നു
സ്വപ്നങ്ങളിലോന്നില്‍ എനിക്കാരുടെയോ പാസ്‌ വേര്‍ഡ്‌ കളഞ്ഞു കിട്ടി
ഞാന്‍ ഒരു അജ്ഞാതനായി ഉറക്കമുണര്‍ന്നു
പാസ്സ്‌വേര്‍ഡ്‌കളെയെല്ലാം താഴിട്ടു പൂട്ടി ഞാന്‍ വലിച്ചെറിഞ്ഞു
ഈ ജന്മമെന്കിലും ഭദ്രമായിരിക്കട്ടെ .

സൂര്യന്‍

പുതിയ വീട്ടില്‍ മറ്റുള്ളവര്‍ക്ക് മുമ്പെ ഓടി നടന്നു ഏറ്റവും സൂര്യ പ്രകാശമുള്ള മുറി എന്റെതായി പ്രഖ്യാപിച്ചു. ചില്ല് ജാലകങ്ങള്‍ തുറന്നപ്പോള്‍ ഇളം കാറ്റ് കൂട്ട് വന്നു. സുഖ നിദ്ര .ക്ലോക്കിലെ അലാരതിനോപ്പം ചെറു ചൂടു ശരീരത്തിലാകെ പടര്ന്നു കയറുന്നു. ചെറുതായി പൊള്ളി തുടങ്ങിയപ്പോള്‍ മനസില്ലാമനസ്സോടെ കണ്ണ് തുറന്നു. സൂര്യന്‍ ചതിച്ചു . ഇന്നലെ മുറി കണ്ട് അസൂയപ്പെട്ടവര്‍ക്കുപോലും ഇന്നത്‌ വേണ്ട. ഞാന്‍ എന്റെ വിധിയെ പഴിച്ചില്ല. അന്ന് മുതല്‍ ആസനത്തില്‍ സൂര്യനുടിക്കുന്നതിനു മുമ്പു ഉണരണം എന്ന് ഞാനെന്റെ സുഹൃത്തുക്കളെ പറഞ്ഞു മനസിലാക്കാന്‍ തുടങ്ങി.